|
|
අනුෂ්කා-කෝලී අතිනත ගනී
“අපි දෙදෙනා අද එකිනෙකාට පොරොන්දු වුණා සදහටම එකිනෙකාට ආදරයෙන් බැඳී සිටින්න. මේ සුබදායි පුවත ඔබත් සමඟින් බෙදා ගන්න අපට ආශිර්වාද හිමි වෙලා තියෙනවා. අපේ පවුලේ සහ ඔබ සැමගේ ආශිර්වාදය සහ සුබ පැතුම් සමඟින් මේ ලස්සන දවස තවත් ගොඩක් විශේෂ වේවි.
පසුගිය කාලයේ විරාත් සහභාගි වූ සෑම ක්‍රිකට් තරගයකම පාහේ ඔහුගේ හොඳම නරඹන්නිය වූයේ ද ඇය යි. එසේම අනුෂ්කාගේ රංගනයන් දකින්නට දර්ශන තලයට පැමිණි හොඳම රසිකයාද ඔහුයි.
ජනප්‍රිය බොලිවුඩ් නිළි අනුෂ්කා ෂර්මා, සුපිරි ක්‍රිකට් ක්‍රීඩක විරාත් කෝලි ආදර කතාව පටන් ගැනුණේ මීට වසර කිහිපයකට පෙරදීයි. මුල් කාලයේ මේ පිළිබඳ දෙදෙනාගෙන් එක් අයෙකුවත් ප්‍රසිද්ධියේ ඒ පිළිබඳ කතාබහ නොකළ අතර තම පෞද්ගලික ජීවිතයේ ආදරය පොදු දෙයක් වනු දැකීමට අකමැති බව ඒ පිළිබඳ විමසන සෑම අවස්ථාවකදීම අනුෂ්කා නිරන්තරයෙන් පැවසූ දෙයක්. මේ වසරේ ආරම්භයේ සිටම විරාත් - අනුෂ්කා විවාහය සිදුවන බවට නෙයෙක් විට ඉඟි පළ කෙරුණා. ඒ ඉඟි සැබෑ කරමින් පසුගිය 11 වැනිදා මෙම ජනප්‍රිය යුවලගේ විවාහය සිදු කෙරුණු පුවත විදුලි වේගයෙන් ලොව පුරා පැතිර ගියා. එසේම එය බොලිවුඩය සහ ක්‍රිකට් ලොව එක් කරමින් සිදු වූ අපූරු විවාහයක් වීමත් විශේෂත්වයක්. පසුගිය කාලයේ විරාත් සහභාගි වූ සෑම ක්‍රිකට් තරගයකම පාහේ ඔහුගේ හොඳම නරඹන්නිය වූයේ ද ඇය යි. එසේම අනුෂ්කාගේ රංගනයන් දකින්නට දර්ශන තලයට පැමිණි හොඳම රසිකයාද ඔහුයි. මේ දිනවල පැවැත්වෙන ශ්‍රී ලංකාව සහ ඉන්දියාව අතර ක්‍රිකට් තරගාවලියට විරාත් නම් නොවීමත් සමඟින් ඔහුගේ විවාහය සිදු වන්නට යන බවට වූ කටකතාවල ද ඉහළ යාමක් ඇති වුණි. කෙසේ නමුත් විරාත් අනුෂ්කා විවාහය සිදු කිරීමට තෝරා ගත්තේ ඉන්දියාව නම් නෙවෙයි. ඒ වෙනුවෙන් ඔවුන් තෝරා ගෙන තිබෙන්නේ, ඉතාලිය යි. ඉතාලියේ මිලාන්හිදී දෙදෙනාගේ පවුලේ ඥාතින් සහ ළඟම හිතමිතුරන් ගේ සහභාගීත්වයෙන් පැවති විවාහ උත්සවය හින්දු චාරිත්‍රානූකූලව සිදු කෙරුණා. මනාල යුවළගේ ඇඳුම් නිර්මාණ කටයුතු සිදු කර තිබෙන්නේ ඉහළ පෙළේ මෝස්තර නිර්මාණ ශිල්පියකු වන සබේසාචි මුඛර්ජි විසින්. ලබන 21 වැනිදා නව යුවල මුම්බායි වෙත පැමිණීමට නියමිත අතර 26 වැනිදා මුම්බායිහිදී ඉන්දීය ක්‍රිකට් කණ්ඩායමේ සාමාජිකයන් ඇතුළුව දෙදෙනාගේ සියලුම හිත මිතුරන් වෙනුවෙන් විශේෂ සාදයක් පවත්වන්නට ද නියමිත බව බොලිවුඩයෙන් ආරංචි වෙනවා. මුම්බායිහි නව නිවසක විරාත් - අනුෂ්කා යුවළ පදංචි වීමට සූදානම් බවත් ඒ අතර වෙනවා. ඉදිරියේදී යෙදන්නට නියමිත ඉන්දීය ක්‍රිකට් කණ්ඩායමේ දකුණු අප්‍රිකානු සංචාරය සමඟින් මේ නව යුවළ ද දකුණු අප්‍රිකාවේ සංචාරයක නිරතවීමට නියමිත බවත් සැළයි. අනුෂ්කා ෂර්මා 2018 වසරේ සිය රංගන ජීවිතයේ කටයුතු අරඹමින් සුපිරි නළු ශාරුක් ඛාන් සමඟින් ආනන්ද එල්. රායිගේ චිත්‍රපටයකට දායක වීමට නියමිතව ඇත. විවාහය පිළිබඳ ප්‍රීතිමත් පුවත සමඟින් අනුෂ්කා - විරාත් යුවළ දෙදෙනාගේ ට්විටර් ගිණුම්වල සටහන් කළේ, “අපි දෙදෙනා අද එකිනෙකාට පොරොන්දු වුණා සදහටම එකිනෙකාට ආදරයෙන් බැඳී සිටින්න. මේ සුබදායි පුවත ඔබත් සමඟින් බෙදා ගන්න අපට ආශිර්වාද හිමි වෙලා තියෙනවා. අපේ පවුලේ සහ ඔබ සැමගේ ආශිර්වාදය සහ සුබ පැතුම් සමඟින් මේ ලස්සන දවස තවත් ගොඩක් විශේෂ වේවි. අපි දෙදෙනාගේ මේ ගමනේ වැදගත් කොටසක් වුණු ඔබ සැමට ස්තූතිවන්න වෙනවා” යනුවෙනි.
|
|
||||||||
|
|
||||||||
සියළුම හිමිකම් ඇවිරිණි |
