|
|
උතුම් පැතුම් ‘ෆේස් බුක්’ හෙවත් තිලක් පුෂ්පකුමාර දැන් ගොඩක් ජනප්‍රියයි
ලසන්ත උඩුකුඹුර
මගේ වසන්ත කාලේ එළඹුණා කියලා හිතෙනවා
* ලසන්ත, ඔන්න මා ඔයාව ඔයාගේ භාෂාවෙන්ම හඳුන්වලා දුන්නා? තැන්කියු වෙරි මච්. මේ තමයි සරසවියේ පළවන මගේ පළමුවැනි පුවත්පත් ලිපිය. ඒකත් මට ලැබෙන්නේ ෆේස්බුක් චරිතය නිසා. ඇතැම් අය මට කියනවා අපි 'උතුම් පැතුම්' බලන්නේ ඔයා හින්දා කියලා. එතකොට මට දැනෙන්නේ කියාගන්න බැරි සතුටක්. * කවුද ඔබට ෆේස්බුක් හෙවත් තිලක් පුෂ්පකුමාරව බාර දෙන්නේ? නිල්වලා ආයතනයේ ලලිත් වසන්ත දවසක් දුරකතන ඇමතුමක් දීලා කියනවා උතුම් පැතුම් එකේ නැගලා යන චරිතයක් තියෙනවා කරමුද කියලා. මං එක පාරටම ඇහැව්වා බයිසිකල්කාරයෙක් ද කියලා. ඔහු නැහැ යනුවෙන් සිනහ වෙලා පවසලා තිලක් පුෂ්පකුමාරගේ චරිතය ගැන කිව්වා. තිර පිටපත අතට ගත්තාම මට තේරුණා මේක වෙනස්ම චරිතයක් කියලා. මට පුළුවන් ආකාරයෙන් තිලක්ට පණ දුන්නා. කිව්වත් වගේම චරිතය නැගලා ගියා. * එහෙත් ඔබට එක්තරා අවස්ථාවකදී මේ චරිතය එපා වෙනවා? ඇත්ත. එහෙම වුණේ ෙමි තියෙන ඩයලොග් ඩිලිවරි කරන්න මට අමාරු වෙච්ච එක. මොකද තැනින් තැන කම්පියුටර්වලට සම්බන්ධ වචන තියෙනවනේ. ඒ කාලයේ උතුම් පැතුම් ලොකේෂන් එකට මං යන්නේ හරිම හිසරදයකින්. මගේ ඔළුව විකාර වෙනවා චරිතය නිරූපණය කරලා අහවර වුණාම. මං දිනක් බැරිම තැන කිව්වා උතුම් පැතුම් අධ්‍යක්ෂ සඳුන් රාජකරුණා හමු වෙලා මට මේ චරිතය කරන්න බැහැ කියලා. නමුත් ඔහු ඇතුළු කිසිවෙක් මට තිලක්ගෙන් ගැළවෙන්න දුන්නේ නැහැ. * අද වන විට ඔබ ඉතා සියුම්ව ප්‍රේක්ෂකයන් තමන්ට නතු කරගෙන ඉවරයි? මං කිව්වනෙ මට ෆේස්බුක්ව එපා වුණා කියලා. මට කවුරුවත් චරිතයෙන් ඉවත් වෙන්න දුන්නෙත් නැහැ. මොකද ඒ තිලක්ට ගැළපෙන්නේ මං විතරක්ම කියලා දැනෙන්නට ඇති. අන්තිමේ ම'විසින් මාවම අධ්‍යනය කරන්න පටන් ගත්තා. තිලක් පුෂ්පකුමාරගේ මනෝ මූලය හොයාගෙන එතැන ඉඳලා රඟපෑම ආරම්භ කළා. ටිකක් කල් යද්දී මට දැනුණා ආයාසයකින් තොරව ඩයලොග් කියවෙනවා කියලා. කොහොම හරි වැඩේ ගොඩ ගිහිල්ලා චරිතෙ පත්තු වුණා. පත්තු වෙලා ගිණි ගත්තා. * ඔබ වඩාත් ජනප්‍රිය වුණේ මේ චරිතය නිසා කිව්වොත් මා නිවැරැදිද? ඔව්. * මා දන්නා පරිදි වසර විස්සකට ආසන්න කාලයක් ඔබ මේ ක්ෂේත්‍රයේ ඉන්නවා? ඔබ අහන්නේ මෙච්චර කල් මං ජනප්‍රියත්වයට පත් වූයේ නැත්තේ ඇයි කියන කාරණය වෙන්න ඇති. මං හිතනවා මේ තමයි මගේ හොඳ කාලේ. මගේ වසන්ත කාලේ එළඹුණා කියලා හිතනවා. වාසනාවත් එක්ක ඒ කරුණු කාරණා එහෙම සිද්ධ වෙනවා කියලා මං විශ්වාස කරනවා. මගේ වාසනාව උදා වුණේ මේ ළඟදී. * ලසන්තගේ ඉතිහාසය ගැන ඊළඟට මට අහන්න හිතුණා? මගේ ගම පොළොන්නරුව. 1990 මං කොළඹ එනවා නළුවෙක් වෙන්න. ඒ කාලේ තනියම පාර පනින්නත් බයයි තියෙන බයට. ඔය කාලෙදිම මට ජයන්ත චන්ද්‍රසිරි මහත්තයාව මුණ ගැහෙනවා. මානෙල් ජාගොඩ මිස් ගාවත් මං සෑහෙන කාලයක් ඉගෙන ගත්තා. ජයන්ත චන්ද්‍රසිරි මහත්තයා ගාව මං සහාය අධ්‍යක්ෂවරයකු විදිහට වැඩ කළා. ඔය කාලේ ලැබුණු අවස්ථාවලදී රංගනයේ ද නිරත වුණා. * ඒ අතරේ කලාව එපා වුණු වෙලාවන්ද තිබුණලු?
* ඒ මොකක්ද? මගේ ළඟ තිබුණනෙ කාර් එකක්. ඒක විකුණලා නාට්‍යයක් කළා. නම ත්‍රිනෙත්‍රා. ලංකාවේ ජනප්‍රිය නළු නිළියන් රැසක් ඒකේ රඟපෑවා. කිව්වාට විශ්වාස කරන්න නාට්‍ය අතිශය අසාර්ථකයි. කාර් එකත් නැහැ, අතේ පිච්චියකුත් නැහැ. ආයෙත් කලාව එපා වුණා. මට හිතුණා ගමට ගිහින් කුඹුරු කොටන්න. සබ්බ සකල මනාවම එකතු කරගෙන කොටුව ස්ටේෂන් එකට ආවා ගෙදර යන්න. අන්න එතනදි මට හමු වුණා මිත්‍රයෙක් සුනන්ද පුෂ්පකුමාර කියලා. ඔහු තමයි මගේ අගය මට කියලා දීලා තුන්වැනි සැරයටත් මා කලා ලොවෙහි තියාගත්තේ. * ලසන්ත දැන් අතිශය ජනප්‍රිය නළුවෙක්. කොහොමද ඔබට ඒ ජනප්‍රියත්වය දැනෙන්නේ? මට ලොකු ආත්ම තෘප්තියක් දැනෙනවා. මේ ළඟදී දවසක කලාකරුවෝ ක්‍රිකට් මැච් එකක් ගහන තැනකට මං ගියා. එතැන හිටපු ඔක්කොමලා මාව වට කර ගත්තා. සමහරු පොත් අත්සන් කරනවා, ෆොටෝ ගන්නවා ඉවරයක් නැහැ. බැරිම තැන මං යාළුවකුට කතා කරලා කිව්වා 'ඇවිත් මාව කොහෙට හරි ගෙනියන්න' කියලා. ඊට පසුව යාළුවත් එක්ක ළඟ නවත්තලා තිබුණු බස් එකකට නැංගා. ඒක කලාකරුවන් ආව බස් එකක්. ටිකක් විවේකීව ඉන්නයි මම හැදුවේ. මොන, ටික වෙලාවකින් මුළු බස් එකම මිනිස්සු වට කර ගත්තා. * ජනප්‍රියත්වය කරදරයක්ද? කොහෙත්ම නැහැ. ජනප්‍රියත්වයට මං කැමැතියි. මැණිකේ අත්තනායක මහත්මිය දිනක් කියනවා පට් පට් සූරසේනගෙන් පස්සේ මිනිස්සුන්ට මතක හිටින චරිතයයකට තියෙන්නේ මේකලු. නදීකා ගුණසේකර මහත්මිය මගෙත් එක්ක ඉඳලා ෆොටෝ ඒකක් ගන්න ඕනෑ කිව්වා. එදා මගේ ඇඟ සීතල වුණා. මං එච්චර වටිනාකමක් ඇති කෙනෙක් ද කියලා. මේ සේරම මං ජනප්‍රිය නිසානේ. * ෆේස්බුක් චරිතය මවන්න ගිහින් වෙච්ච අමතකම නොවන අත්දැකීම ගැන කතා කරමු? එක්තරා දර්ශනයක් තිබුණා මාව පුන්නක්කු බාල්දියකින් නාවන. ඉතින් මාව නාවන නළුවා මගේ ඔළුවට හොඳට පුන්නක්කු හැළුවා. මගේ කන් දෙකටත් පුන්නක්කු ගියා. එදා නම් පුදුම අපහසුතාවයකට ලක් වුණේ. * මේ වන විට ඔබ වෘත්තීය නළුවෙක්ද? නැහැ. මං වෙළෙඳ දැන්වීම්වල ඇඳුම් නිර්මාණ ශිල්පියකු වශයෙන් වැඩ කරනවා. ඒක තමයි මගේ වෘත්තීය. * උතුම් පැතුම් නාට්‍යයට අමතරව කෙරෙන ඔබේ වෙනත් රංගන කටයුතු මොනවාද? මුණිදාස කුමාරතුංගයන්ගේ හීන්සැරය ඇසුරෙන් නිර්මාණය වූ කටුසුපාලිය වේදිකා නාට්‍යයෙහි රංගනයෙන් දායක වෙනවා. මම එහි නරිහාමි. සුමින්ද ගුණරත්නනයි එය අධ්‍යක්ෂණය කරන්නේ. කාලෙකට පසුව ළමුන් වෙනුවෙන් තැනූ හරවත් වේදිකා නාට්‍යයක් ලෙස එය හඳුන්වන්න පුළුවන්. * කොහොමද දැන් පොළොන්නරුවේ ගියාම ඔබට තියෙන ප්‍රතිචාර? ගොඩක් හොඳයි. ඒත් මං ගමේ ගියාම සුපුරුදු ගැමියා වෙනවා. යාළුවොත් එක්ක පැල් රකින්න ගිහින් තවමත් ඒ අත්දැකීම විඳ ගන්නවා. නළුවා වුණා කියලා මගේ වෙනසක් නැහැ.
|
|
||||||||
|
|
||||||||
සියළුම හිමිකම් ඇවිරිණි |
තිලක් පුෂ්පකුමාරව හඳුනනවාද? එහෙම කිව්වොත් ඔබ බලයි ඒ කවුද කියලා. හරි, මං මෙහෙම
කියන්නම් , මෙයා ඉන්නේ උතුම් පැතුම් නාට්‍යයේ. දැන් මතකද? ඒත් සමහරුන්ට නම් එහෙම
කිව්වත් මතක නැතුව ඇති. එහෙනම් ඒ නාට්‍යයේ ඉන්න මිස්ටර් ෆේස්බුක් කියලා
කිව්වොත්...? ආයේ ඉතින් තවත් හඳුන්වා දෙන්න ඕනෑ නැහැ. එතරම්ම මේ ෆේස්බුක්
ජනප්‍රියයි. මෙතන විව් වෙලා ඉන්නේ එයා. අද ඔහු සරසවියට ඩවුන්ලෝඩ් වුණා. ඊට පස්සේ
තමන්ගේ කතාව මෙන්න මෙහෙම ප්ලේ කළා. ෆේස්බුක්ගේ බර්ත් වර්ෂන් එකේ තියෙන නම ලසන්ත
උඩුකුඹුර.
කලාවේ වෙන යම් යම් හිත රිදීම් මත මට කලාව එපා වුණා. ඊට පස්සේ ජොබ් එකක් කරලා කාර්
එකකුත් ගත්තා. නමුත් ඇඟේ තිබුණේ කලාව. ඕනෑ මඟුලක් වෙච්චදෙන් කියලා යළිත් කලාවට ආවා.
එතකොට තමයි නියම වැඩක් වුණේ.
