|
|
කත්‍රිනාගේ හොඳම රඟපෑම Phantom
2008 වසරේ නොවැම්බර් මස පකිස්තානු ත්‍රස්තවාදීන් දස දෙනෙකුගේ කණ්ඩායමක් විසින් දින හතරක් ඇතුළත ඉන්දියාවේදී වෙඩි තැබීම් හා බෝම්බ ප්‍රහාර 12ක් සිදුකෙරිණි. එයින් පුද්ගලයින් 164ක් මරුමුවට පත් වී 300ට වැඩි ප්‍රමාණයක් තුවාල ලැබූ බව වාර්තා විය.මුළු මහත් ජගත් ප්‍රජාවේම අවධානය යොමු වූ මෙම ප්‍රහාරයෙන් පසුව ඇති වූ තත්ත්වයන් පාදක කොට ගෙන එස් හුසේන් සෙයිඩ් ලේඛකයා අතින් මුම්බායි ඇවෙන්ජර්ස් නම් ප්‍රබන්ධය නිර්මාණය විය. එහි කතාව සැකෙවින් මෙසේය. මුම්බායි ප්‍රහාර වලින් වසර පහකට පසුවත් ඉන්දියාව අසරණව තවමත් යුක්තිය සොයයි. ප්‍රහාරය පසුපස සිටී මහ මොළකාරයන් කොටුකර ගැනීම ඉන්දීය රජයට තවමත් ප්‍රහේළිකාවකි. රජය ඇතිකර ගත් එකම දෙය නම් ත්‍රස්ත විරෝධී කොමිසමය. නමුත් මෙම කෲරතර ප්‍රහාරයේ පළිය ගන්නා තෙක් නොනැවතෙන එක් පුද්ගලයෙකි. ඒ විශ්‍රාමලත් ලුතිනන් ජනරාල් සහේඩ් අලි ය. නීනිගරුක පොලිස් නිළධරයෙක්, විශේෂඥ තාක්ෂණවේදියෙක්, විද්‍යාඥයෙක් සහ හමුදා නිළධාරීන් දෙදෙනෙකු සමඟ රහසිගත මෙහෙයුමක් අරඹන මොහුගේ අධිෂ්ඨානය ස්වකීය මවුබිමට යුක්තිය ඉටු කිරීමයි. කබීර් ඛාන් විසින් අධ්‍යක්ෂණය කරන ලද සජිත් නදියත්වාලා සහ සිද්ධාර්ත් රෝයි කපූර් විසින් නිෂ්පාදනය කරන ලද Phantom (පැන්තම්) චිත්‍රපටය මුම්බායි ඇවෙන්ජර්ස් කෘතිය ආශ්‍රය කරගෙන නිර්මාණය වූ චිත්‍රපටයකි. සයිෆ් අලි ඛාන් සහ කත්‍රිනා කායිෆ් ප්‍රධාන චරිත නිරූපණය කරන පැන්තම් චිත්‍රපටය පසුගිය 28 වැනිදා ලොවපුරා ප්‍රදර්ශනය ආරම්භ කළේය. එහි නිමැවුම් පිරිවැය ඉන්දියානු රුපියල් මිලියන 40කි. පැය 2කුත් විනාඩි 28ක් පුරා දිවෙන පැන්තම් සංගීතවත් කර ඇත්තේ ප්‍රීතම් චක්‍රබෝර්ති හා ජුලියස් නම් සංගීතඥයන් විසිනි. 2013 වසරේ ඔක්තෝබර් මාසයේදී පැන්තම් චිත්‍රපටයේ රූගත කිරීම් ආරම්භ කළේ ලෙබනනයේ අගනගරය වූ බේරුට්හිදීය. ජම්මු කාශ්මීර්, පන්ජාබ්, එක්සත් රාජධානියේ ලන්ඩන්, කැනඩාවේ වැන්කුවර් ආදි ස්ථාන මේ වෙනුවෙන් පසුතල වීය. චිත්‍රපටයේ අවසන් කොටස් කිහිපයක් රූගත කරන ලද්දේ මුම්බායිහිදීය. බොලිවුඩ් ක්‍රියාදාම චිත්‍රපටයක් ලෙසින් පැන්තම් චිත්‍රපටය සම්බන්ධයෙන් විචාරකයන් මිශ්‍ර අදහස් පළ කර තිබේ. පිරිසක් එහි සාර්ථකත්වය ගැන කතා කරනවිටදී තවත් පිරිසක් එහි අසාර්ථක වූ ස්ථාන පෙන්වා දී ඇත. මෙහිදී එක් විචාරකයෙක් හොඳ ත්‍රාසජනක චිත්‍රපටයක් යැයි කියන විටදී තවත් අයෙකුගේ අදහස වූයේ එහි නීතියක් නොමැති බවයි. කෙසේ වෙතත් කත්‍රිනාගේ රංගනය සහ සංගීතය බොහෝ විචාරකයන්ගේ පැසසුමට ලක් වී තිබේ.
|
|
||||||||
|
|
||||||||
සියළුම හිමිකම් ඇවිරිණි |
