|
|
අවුරුදු තිස්පහයි ගීත තිස්පහයි
“මේ දෙව් මැදුරේ“ ගීත ප්‍රසංගය සහ සංයුක්ත තැටිය ඔක්. 31 දා එළිදකී
මේ දෙව් මැදුරෙම පුදසුන අබියස ඉඳ දශක තුනහමාරකට වැඩි කාලයක් ශ්‍රී ලාංකේය ගීත ශ්‍රාවක සිත්ගත් එම ගීතය මෙන්ම “සමාව ඉල්ලා දෙපා සිඹින්නට“ - “දීග නොයන් රත්තරනේ“ - “වාරු නැගෙන් සිත“ - “හැම උදෑසනම මට ආයුබෝවන් කීවා“ - “මහ සයුරේ ගැඹුරු දියේ“ - “මල් සිනාවකින් ඔබේ මුවේ“ - “මනෝහාරී සුවඳ පොට්ටු“ - “අවන්හලක ඉපදී“ - “තරු කතා කර අසයි“ වැනි ගීත ද ගායනා කරන ඔහු ස්වකීය ගායන දිවියට මේ වනවිට වසර 35 ක් සපුරා සිටියි. ගායන ශිල්පියෙකු මෙන්ම ගීත ප්‍රසංග සම්බන්ධිකරණ ශිල්පියෙකු ලෙසින් ද කටයුතු කරමින් සංගීත ක්ෂේත්‍රයේ නමක් දිනා සිටින ඔහු - ෂෙල්ටන් මුතුනමගේ ය.
ඔක්තෝබර් 31 වැනිදා සවස 6.30 ට මීගමුව ආවේමරියා විද්‍යාලීය ශ්‍රවණාගාරයේ දී සිය ඒක
පුද්ගල ගීත ප්‍රසංගය වන “Shelton Muthunamage Live
in Concert - මේ දෙව් මැදුරේ“
පැවැත්වීමටත් ඊට සමගාමීව “මේ දෙව් මැදුරේ“ නමින්ම සිය ගීත ඇතුලත් ප්‍රථම සංයුත්ක
තැටිය එළිදැක්වීමටත් ෂෙල්ටන් මේ වනවිට සූදානම් ය. ඒ නිමිත්තෙන් “සරසවිය“ ෂෙල්ටන්
සමඟ කළ කතාබහ අපි මෙලෙස අකුරු කරමු.
“ගායකයෙක් වශයෙන් අවුරුදු 35 ක් මං මේ ක්ෂේත්‍රයේ රැඳී උන්නත් තාම ගායනා කරලා තියෙන්නේ ගීත 35 ක් විතර තමයි. ගීත ගණන වැඩි කරගන්න මට ඕනෑ වුණේ නැහැ. මගේ ගීත රසික රසිකාවියන් මෙතරම් දිගු කාලයක් මා ගායනා කළ මේ ගීත කිහිපය සමඟ රැඳී සිටීමෙන් වැටහෙනවා පවතින ගුණාත්මක ගීත ගායනා කරනවා නම් ගායන ශිල්පියෙකු ලෙස රසිකාදරය දිනාගෙන රැඳී සිටින්න ගීත සිය දහස් ගණනක් ගායනා කරන්න අවශ්‍ය නැති බව. එමනිසා මේ අවස්ථාවේ මම මුලින්ම ස්තූතිවන්ත වෙනවා මගේ කටහඬින් ගයන්න මට හරවත් ගීත පද රචනය කර දුන් ගී පද රචක රචිකාවන්ටයි එම ගී පදමාලාවන්ට රසවත් තනු නිර්මාණය කර දුන් සංගීතඥයින්ටයි. ඔවුන්ගේ නිර්මාණ දායකත්වය නිසා තමයි වෘත්තීය ගායන ශිල්පියෙකු හැටියට මට අදත් මේ ගමන සාර්ථක කරගන්න හැකියාව ලැබී තියෙන්නේ.“ “මුලින්ම මා ගායනා කළ ප්‍රේමකීර්ති ද අල්විස් ලියූ ප්‍රියා සූරියසේන තනු නිර්මාණය කළ ‘ලොවම හඬා කියාවි‘ ගීතයේ සිට මා ආ මේ ගමනේ දී අපමණ බාධක කැපිලි කෙටිලි වලට මුහුණ දෙන්න වුණත් ඒ සියල්ලට සාර්ථක ලෙස මුහුණ දී ඒවා ජයගන්න හැකි වීම නිසා අද මට ඉමහත් සතුටක් දැනෙනවා. එච්. ආර්. ජෝතිපාලයන් මෙන් අසහාය ගායන ශිල්පියෙකු වෙන්න අපි කාටවත්ම බැහැනේ. ඉතින් දෙවියන් වහන්සේ මට දුන්නු ගායන හැකියාවෙන් මා මේ පැමිණ සිටින දුර පිළිබඳව මං තෘප්තිමත් වෙනවා. මගේ ගායන ජීවිතයේ විශේෂ සිහිවටනයක් ලෙස තමයි ‘‘Shelton Muthunamage Live in Concert - මේ දෙව් මැදුරේ‘ ගීත ප්‍රසංගය සමඟ මා ගායනා කළ ගීත ඇතුලත් “මේ දෙව් මැදුරේ“ සංයුක්ත තැටිය ලබන 31 වැනිදා මගේ ගීත ශ්‍රාවකයින්ට ඉදිරිපත් කරන්නේ.“ ඔබේ “මේ දෙව් මැදුරේ“ ගීත ප්‍රසංගයේ විශේෂාංග මොනවා ද..? “මා මගේ ගීත අතරින් ‘මහ සයුරේ ගැඹුරු දියේ‘ ගීතය මෙහිදී රංගන ශිල්පි ක්ලීටස් මෙන්ඩිස් සමඟ ගායනා කිරීම එක් විශේෂාංගයක්. මන්ද එය මා මුලින් ගායනා කරන්න උන්නේ විජය කුමාරතුංග මහත්මයා සමඟ වුවත් ගීත පටිගත කිරීමට සතියකට කලින් ඔහුව ඝාතනය කෙරුණු නිසා මට තනිව ගායනා කරන්න වුණා. අපි දෙන්නා දුම්රියෙන් පාසල් ගියේ ආවේ එකට. ඒ මතක සමරා මගේ ප්‍රසංගයේ දී මං ක්ලීටස් සමඟ මේ ගීතය ගයනවා. තව රංගන ශිල්පි රවීන්ද්‍ර රන්දෙනිය සමඟ විශාරද එඩ්වඩ් ජයකොඩි, චරිතා ප්‍රියදර්ශනී පීරිස්, නිහාල් නෙල්සන්, අතුල අධිකාරි, සමිතා මුදුන්කොටුව, ශෂිකා නිසංසලා, ශානිකා වනිගසේකර, රොනී ලීච්, ලක්ෂ්මන් හිල්මි යන ගායන ශිල්පීන් හා ශිල්පිනියනුත් මේ ප්‍රසංගයේ දී ගීත ගායනා කිරීමට එක් වෙනවා. වාසනා තල්ගහගොඩ නර්තන විශේෂාංග ඉදිරිපත් කරන අතර සුමිත් ප්‍රියංකර ප්‍රමුඛ සංගීත කණ්ඩායම සංගීතයෙනුත්, ආරාධිතයින් ලෙස ශ්‍රියානි අමරසේන, සනත් ගුණතිලක, ජීවන් කුමාරතුංග යන රංගන ශිල්පීන් හා ශිල්පිනියන් ද සහභාගි වෙනවා.“ ගීත ප්‍රසංගයට සමගාමීව ඔබ ගැයූ ගී ඇතුළත් සංයුක්ත තැටියක් එළිදක්වනවා නේද..? “ඔව්, මා ගායනා කළ ජනප්‍රිය ගීත 13 ක් සමඟ අලුත් ගීත 3 ක් ඇතුලත් ‘මේ දෙව් මැදුරේ‘ සංයුක්ත තැටියයි ඒ. මේ මා මගේ ගායන දිවියේ එළිදක්වන ප්‍රථම සංයුක්ත තැටියයි. මීට ඉහත ‘දීග නොයන් රත්තරනේ‘ - ‘වාරු නැගෙන් සිත“ සහ ‘මල් සිනා‘ නමින් කැසට් පට තුනක් නිකුත් කර තියෙනවා. මගේ ගායන දිවියේ දී විශාරද මාලිනි බුලත්සිංහල (“මේලොවේ සඳ තරු ඡායාවේ“) - නිරංජලා සරෝජිනි (“පාසලේ පන්තියේ“) - චන්ද්‍රලේඛා පෙරේරා (“ප්‍රේමාදරේ මායා දැලේ“) සහ ශිරෝමාලා ප්‍රනාන්දු (“සොඳුරිය තනිකර“) ගායන ශිල්පිනියන් සමඟ යුග ගී ගයා තියෙනවා. ඒ සෑම ගීතයකටම මා ගැයූ තනි ගීත වලට මෙන්ම රසික රසිකාවියන්ගෙන් හොඳ ප්‍රතිචාර ලැබී තියෙනවා.“ ඔබේ “මේ දෙව් මැදුරේ“ ගීත ඇල්බමයේ ඇතුළත් නිර්මාණ සඳහා දායක වී ඇති නිර්මාණකරුවන් කවුරුන් ද..? “ලක්ෂ්මන් හිල්මිගේ නව සංගීතයට තමයි මම මේ ගීත ඇල්බමයේ ඇතුලත් සියලුම ගීත ගායනා කළේ. සංගීත අධ්‍යක්ෂණයෙන් හිල්මිත් ගී තනු නිර්මාණයෙන් ආචාර්ය රෝහණ වීරසිංහ, එච්. එම්. ජයවර්ධන, අර්නස්ට් සොයිසා, සරත් ද අල්විස්, උපාලි කන්නන්ගර, නීල් වර්ණකුලසූරිය, අර්නි පීරිස්, ප්‍රියා සූරියසේන, ග්‍රේෂන් ආනන්ද, ජයන්ත දිසානායක, ජයන්ත ප්‍රනාන්දු සහ ලක්ෂ්මන් හිල්මි දායක වුණා. කරුණාරත්න අබේසේකර, ප්‍රේමකීර්ති ද අල්විස්, ආචාර්ය අජන්තා රණසිංහ, බණ්ඩාර ඇහැලියගොඩ, ඩොනල්ඩ් අයිවන්, ආනන්ද පද්මසිරි, හේමසිරි හල්පිට, ජෝජ් රොබ්සන් ද සිල්වා, ලලිත් වසන්ත, ජයන්ත ප්‍රනාන්දු සහ ශ්‍රියානි මංගලිකා ගී පද රචනයෙන් දායක වී තියෙනවා.“
සමාව ඉල්ලා දෙපා සිඹින්නට ගීත ප්‍රසංග සම්බන්ධිකරණ ශිල්පියෙකු ලෙසත් වසර ගණනක අත්දැකීම් ඇති ඔබ එදා මෙදා එළිමහන් ගීත ප්‍රසංග පිළිබඳව දරන්නේ කුමන අදහසක් ද..? “එදා එළිමහන් ගීත ප්‍රසංග කලාව හරි සුන්දරයි. ලංකාවේ එක රෑට ප්‍රසංග 5 ක් 6 ක් පවා මම ඒ කාලේ සම්බන්ධිකරණය කරලා තියෙනවා. දැන් එහෙම බැහැ. දැන් සමහර ප්‍රවීණ ගායක ගායිකාවන්ගේ ගීත ගයන නවක ගායක ගායිකාවෝ කෙලින්ම රුපියල් පණස්දාහ, හැත්තෑදාහ වගේ ඉල්ලනවා. සමහරු වේලාවල් දෙනවා. ඒ වගේම සංගීත කණ්ඩායම් මුලින්ම පැය දෙක හමාරක් වේදිකාවේ සෙල්ලම් කරනවා. නවකයින් ප්‍රවීණයින්ව අඳුනන්නේ නැහැ වගේ හැසිරෙනවා. මට ඔවැනි දේවල් බලන් ඉන්න බැරි හින්දා දැන් වැඩිපුර ප්‍රසංග සම්බන්ධිකරණය කරන්න බාර ගන්නෙත් නැහැ. මට විශ්වාසවන්ත සංගීත ප්‍රසංග සංවිධායකවරු වෙනුවෙන් පමණයි දැන් මම ප්‍රසංග සම්බන්ධිකරණ කටයුතු බාර ගන්නේ. ඉස්සර දෙමව්පියන් දරුවන් සමඟ පැදුරු කොට්ට අරන් ඇවිල්ලා පාන්දර 3, 4 වෙනතුරු එළිමහන් ගීත ප්‍රසංග රසවින්ඳා. ඒත් අද ඒ තත්වය වෙනස් වෙලා. දැන් එළිමහන් ගීත ප්‍රසංග නරඹන්න එන ගැහැනු ළමයි අඩු වෙලා. විශේෂයෙන්ම කියන්න ඕනේ, එළිමහන් ගීත ප්‍රසංග නරඹන්න එන රසික සමාජයේ හැසිරීම හරිම දුර්වලයි. ගහ බැණ දොඩා මිනි මරාගන්න තත්වයට පත්වෙන අවස්ථාවන් පවා තියෙනවා. ඒ නිසා එදා තරම් මෙදා එළිමහන් ප්‍රසංග වේදිකාව සුන්දර තැනක් නොවන බව තමයි මගේ අදහස.“ ඔබ අවුරුදු 30 ක් පුරා එදා මෙදා ගමන් බිමන් යන්නේ ඔබගේ පැරණි මෝටර් රථයෙන්. එහෙත් මෑතදී ගායන ක්ෂේත්‍රයට එක් වූ සමහර ගායකයින් ඉතා වටිනා නවීන මෝටර් රථ වලින් ප්‍රසංග සඳහා සහභාගි වෙන්න පැමිණෙනවා. ඒ ඇයි..? “අවුරුදු තිහක් පුරා තවමත් මං පාවිච්චි කරන්නේ මගේ පරණ ජචප එකමයි. අවුරුදු 35 ක් සින්දු කියලා මං ජීවත් වුණා. එච්චරයි. හැබැයි දැන් බොහෝ දෙනෙක් බලන් ඉන්නේ ගායකයෙක් නම් ලක්ෂ 50, 60, 80 වගේ වටිනා අලුත් ජචප එකකින් ඇවිල්ලා බහිනවා දකින්නයි. ඒත් ඔය සමහරු අද එන කාර් එකේ නෙමේ හෙට එන්නේ. අහිංසක ගීත රසිකයින්ට මවා පානවා තමන් තමයි ගායකයා හෝ ගායිකාව කියලා. ඒත් යථාර්තය ඒක නෙමෙයි. ඒ සමහරු එහෙම එන්නේ පඥදබ එකට ජචප අරගෙනයි. එහෙම ඇවිල්ලා රුපියල් 75 000/= 80 000/= අයකරන ගායක ගායිකාවෝ ඉන්නවා. ඔය මවා පෑම් කරලා හොඳ ගී නිර්මාණ නොකර මේ ක්ෂේත්‍රයේ රැඳී ඉන්න කාටවත්ම බැහැ. අපි මේ අවුරුදු 35 ක්ම රැඳීලා ඉන්නේ පවතින හොඳ ගී නිර්මාණ කරපු හින්දයි. දැන් පරපුරේ සමහරුන්ට ඕනේ තාවකාලික ප්‍රසිද්ධියයි මුදලුයි පමණයි. වෙනස එයයි.“ ඔබේ දියණිය ව්‍යංගා සිතාරිත් කලාවට සම්බන්ධයි නේද..? “දුවට ගීත ගායනයට, රංගනයට වගේම මෝස්තර නිරූපණයටත් හැකියාව තියෙනවා. දැනට මෝස්තර නිරූපිකාවක් ලෙස කටයුතු කරනවා. පුංචි කාලේ ‘ළඳුනි ඔබ දෙවඟනකි‘ චිත්‍රපටයෙත් පසුව ‘සුදුයි උසයි‘ ටෙලි නාට්‍යයෙත් දුව රඟපෑවා. මගේ මේ ගීත ප්‍රසංගය සංවිධානය කරන්නෙත් දුවයි.“ “සරසවිය“ පාඨක ගීතලෝලීන්ට මේ අවස්ථාවේ ඔබ ආරාධනා කරනවා නම්..? “අවුරුදු තිස් පහක් මගේ ගීත රස විඳීමින් මා සමඟ රැඳී උන්නා වගේම ඔක්. 31 වැනිදා හැන්දෑවේ 6.30 ට ත් එන්න, මීගමුවේ ආවේමරියා විද්‍යාලයේ ශ්‍රවණාගාරයට මා ගයන ගීත සජීවීව රස විඳීන්න. මගේ ‘මේ දෙව් මැදුරේ“ ගීත තැටියත් එදාට ඔබට ලබා ගන්න පුළුවන් එහිදී. මම බලාපොරොත්තුවෙන් ඉන්නවා 31 වැනිදා සැන්ඳෑව ඔබේ මතකයේ සදා රැඳෙන සුන්දර ගීතවත් සැන්ඳෑවක් කරන්න.“
මල් සිනාවකින් ඔබේ මුවේ |
|
||||||||
|
|
||||||||
සියළුම හිමිකම් ඇවිරිණි |
