|
|
අර්ජුන්ගෙන් පිළිතුරු
ප්‍රශ්නය - ප්‍රවේගය චිත්‍රපටය කොපියක්ද? ඩී. බී. කුලතුංග - පූගොඩ අර්ජුන් - කොපියක් නොවෙයි. එය පොල්ලාදවන් චිත්‍රපටයේ අනුකරණයක්. ප්‍රශ්නය - ශ්‍රී ලංකාවේ ප්‍රදර්ශනය කළ ප්‍රථම හින්දි චිත්‍රපටය කුමක්ද? වියානි ගුණවර්ධන, ශීලා වැන්ඩර්ලන් වෙන්නප්පුව අර්ජුන් - බිල්වා මන්ගල්. ප්‍රශ්නය - ලස්සනයි බලන්න චිත්‍රපටයේ හරක් මුදලාලි ලෙස රඟපෑ සටන් නළුවා කවුද, මනහර මහින්ද, බෙලිගල අර්ජුන් - මේ චිත්‍රපටය මම නරඹා නැහැ. හරකා කවුද කිව්වොත් මුදලාලි ගැන කියන්නම්. ප්‍රශ්නය - මෙරිල් ඇල්බට් අධ්‍යක්ෂණය කළ චිත්‍රපට මොනවාද? චන්ද්‍රකාන්ති ධර්මරත්න, කැලණිය අර්ජුන් - දාහකින් එකෙක් සහ අපි දෙන්නා. ප්‍රශ්නය - ප්‍රවේගය තුළින් ආ ප්‍රවේගවත් වීරයා හේමාල් රණසිංහ ගැන ඔබට මොනවාද හිතෙන්නේ? ආනන්ද වික්‍රමආරච්චි, ඉහළ තල්දූව අර්ජුන් -ඔහු අනාගතයක් තිබෙන අති දක්ෂ නළුවෙක්. ප්‍රශ්නය - සතිස්චන්ද්‍ර එදිරිසිංහ අනංගරාල නමින් නාට්‍යයක් නිර්මාණය කළාද? එහි චරිත රඟපෑවේ කවුද? ඩබ්ලිව්.වීරසේකර, බෙලිහුල්ඔය අර්ජුන් - ඔව්, මාලිනී ෆොන්සේකා එහි රඟපෑවේ. 1967 අවුරුද්දේ හදපු මේ නාට්‍යය පසු කාලේ බකතපස් කියලා වෙනස් වුණා. ප්‍රශ්නය - ස්ටැන්ලි පෙරේරා ප්‍රථමයෙන් රඟපෑ චිත්‍රපටය කුමක්ද? එච්. වී. කේ. පියදාස අර්ජුන් - කැලෑහඳ. ප්‍රශ්නය - චිත්‍රපටයක් රූගත කරමින් සිටින විට ප්‍රධාන නළුවා මිය ගියොත් මොකද කරන්නේ? එන්. එස්. සුරංග, දංගොල්ල අර්ජුන් - සිම්පල්, එක්කො ආදාහනය කරනවා නැතිනම් භූමදානය කරනවා. චිත්‍රපටයට වෙන නළුවෙක් ගන්නවා. ප්‍රශ්නය - සිංහල සිනමාවේ මා ප්‍රියතම නිළිය ලෙස අපූර්ව චරිත මැවූ නදීකා ගුණසේකර දැන් දකින්නට ලැබෙන්නේ නෑ. ඇය සිනමාවෙන් සමුගෙනද? සුනිල් බී. වේහැල්ල, ගෝනපොල අර්ජුන් - ඇයි දෙයිියනේ මේ දවස්වල මහරජ අජාසත්ත චිත්‍රපටයේ රඟපානවා. ප්‍රශ්නය - චූඩාමාණිකේ චිත්‍රපටයේ අධ්‍යක්ෂක කවුරුන්ද? එහි රඟපෑ නළු නිළියන් කවුරුන්ද? එච්. එච්. ජයලත්, පෙතියාගොඩ, ගම්පහ අර්ජුන් - අධ්‍යක්ෂණය විජය ධර්ම ශ්‍රී. රඟපෑවේ රවීන්ද්‍ර රන්දෙනිය, වසන්ති චතුරානි, ආනන්ද වික්‍රමගේ, වීණා ජයකොඩි, ලූෂන් බුලත්සිංහල.
ඔබේ සිනමා පැන විසඳුම් අර්ජුනගෙන් පිළිතුරු. සරසවිය, ලේක්හවුස්, කොළඹ 10 |
|
||||||||
|
|
||||||||
සියළුම හිමිකම් ඇවිරිණි |
