කලාව හොඳයි, ඒත් බාධක වැඩියි ආයෙමත් කාටත් නටන්න පුළුවන් ලාංකේය අධ්‍යාත්මය නැංවීමෙහිලා සිනමා කතිකාව හෙට ජෝතිපාලයන් සමරා දන්සලක් ඔලබොඩුවේදී... බොන්න තව මන්ද ප්‍රමාදේ? උත්කෘෂ්ට සිතුවමක් හා පෙමින් බැඳීම ලොතරැයි දිනුම දවස් තුනෙන් නැති කළ ජෝති... නටලා නටලා හරියට මහන්සි ඇති - ඒ මගේ මුල්ම දෙබස මගේ ශබ්ද කෝෂයේ විවේකය නෑ හීරෝ නීරෝ එන්න ළඟයි මම දන්නවා ප්‍රේක්‍ෂකයෝ ඉල්ලන්නේ මොනවද කියලා... රැකෙනු නැත්නම් තැවෙනු හද උතුරන සෝ දුක කියමි - හිමි පාමුල මම වැඳ වැටෙමි විශ්වාසය පාදක කරගත් දැන්වීමක් දැන්නම් ජීවිතේ පොඩි විනයක් තියෙනවා නන්දනී මැඩම්ගේ අවවාද තවමත් මට මතකයි හඳගම සමඟ ඇහැරෙන්න සංවාද සම්මන්ත්‍රණය සුමති සම්මාන කාටද? හඳ මාමාට ආදරය කළ ළමා ගායිකාව චන්ද්‍රා කබ්රාල් බඩ නැත්නම් වැඩ නෑ... රඟපෑමේ තරම ගැන ලේ වලින් සාක්කියක්.... පුණ්‍ය කටයුත්තට පෝන් නම්බර්.... දිනුම් කණුව ළඟ දවස පුරා සිංහල සිනමා විස්තරය ෆ්ලෑෂ් ගෝඩ්න් ජාතික රූපවාහිනියෙන් ඒක තමයි ලොකුම ප්‍රහසනය විද්‍යාගෙන් චැප්ලින්ට රාම් ලඛාන් ආයෙමත් ඛාන් ත්‍රිත්වයට චරිත සහතිකයක් නිදහස් දිනයට ඓශ්වර්යා එයි මසාන්ට බුහුමන් මිලියන 10ක්

විශ්වාසය පාදක කරගත් දැන්වීමක්

මේ පුංචි දඟකාරයා නිමන්ති පෝරගේ ගේ පුත්‍රයා

දැන්වීම් කලාව අද ලෝකයේ සීඝ්‍රයෙන් වර්ධනය වන නිර්මාණ කලාවක් බවට පත් වී තිබේ. තත්පරයෙන් තත්පරයට ජනතාව දිනා ගැනීම වෙනුවෙන් මේ දැන්වීම් කලාව එකිනෙක සමඟ තියුණු තරගයකය. ඒ වෙනුවෙන් එකිනෙකට වෙනස් විවිධාකාර නිර්මාණ ඔස්සේ අපට පණිවුඩ, තොරතුරු ලබා දෙන්නට ඔවුන් සැදී පැහැදී සිටියි. මේ දිනවල පුංචි තිරය ඉදිරියේ සිටින ඔබට දකින්නට ලැබෙන වෙළෙඳ දැන්වීම් අතරේ විශේෂ වූ දැන්වීම් දෙකක් ගැනයි අද අපේ කතාව.

“ඇයි තාත්තා කොළ අත්තක් එල්ලුවේ?”

“විශ්වාසෙට”.

“අපේ මුතුන් මිත්තන් එහෙම කළේ පාර වරදින එකක් නැහැ කියන විශ්වාසයට. ”

“ඉතිං තාමත් පාර වරදිනවද?”

“හරි විශ්වාසවන්තයෙක් ඉන්නවානම් පාර වරදින්නේ නැහැ.”

පියෙකු, මවක සහ පුංචි පුතෙකු දුර ගමනක් යන අවස්ථාවකදී ඇති වන මේ සංවාදය අසන, දකින ඔබට හැඟෙනුයේ කුමක්ද? අතීතයේ මුතුන්මිත්තන් කොළ අතු එල්ලා දුර ගමන් යෑම පිළිබඳ කතා අපි කෙතෙකුත් අසා ඇත්තෙමු. පාර නොවරදින්නේය යන විශ්වාසය මත එදා ඔවුන් එලෙස කොළ අතු එල්ලමින් ගමනේ යෙදුනේ අද වගේ එළිපෙහෙළි කළ මාර්ග එදා නොවූ බැවිනි. අද ඊට වඩා බොහෝ වෙනස්ය. ඉතිං තාමත් පාර වරදිනවද? පුංචි පුතාගේ පැනය සාධාරණය. ඔහුට යමක් වැටහෙන්නේය. නමුත් නොදන්නා දේ ඔස්සේ මේ පුංචි පුතා සමාජයටද දෙන්නේ පණිවුඩයකි.

අපේ රටේ ප්‍රමුඛ පෙළේ බැංකුවක ණය පහසුකමක් පිළිබඳ විස්තර ගෙන එන මේ දැන්වීම පිළිබඳ කාගේත් අවධානය යොමුව තිබේ. එහි නිර්මාණ අධ්‍යක්ෂ හරිත් ගුණවර්ධන සමඟින් මේ විශේෂ දැන්වීම පිළිබඳ තොරතුරු කතා කරමු.

පැරණි සංකල්පයක් වර්තමාන සමාජයට ගෙන එමින් මෙවැනි නිර්මාණයක් කරන්න හිතුවේ ඇයි?

කාලය ගත වී අපේ සමාජය මොන තරම් දියුණු තත්ත්වයට පත් වෙලා තිබුණත් අපේ මුතුන් මිත්තන් විසින් පවත්වාගෙන පැමිණි ඇතැම් චාරිත්‍ර අදටත් සිදු කෙරෙනවා දකින්න හැකිවන අවස්ථා තිබෙනවා. ඒ අතරේ දුර ගමනක් යන විට කොළ අත්තක් කඩා ගසකින් තැබීම විශේෂ වුණා. එතැනදී මුල් වුණේ විශ්වාසය යි. මේ දැන්වීම ණය පහසුකමක් ගැන කියවෙන නිසා විශ්වාසය තහවුරු කිරීම වෙනුවෙන් මේ පැරණි සංකල්පය යොදා ගන්න මම තීරණය කළා. සම්පත් බැංකුවේ ලෙන්ඩින් ණය පහසුකම වෙනුවෙනුයි මෙය නිර්මාණ වුණේ. ඔවුන් දේශීයත්වය අගයන නිසා මේ නිර්මාණය එයට අපූරුවට ගැළපුනා.

මේ වෙනුවෙන් අදහස ඇති වුණේ කොහොමද?

ඇත්තටම ඒක මගේ අත්දැකීමක් කිව්වොත් ඔබ විශ්වාස කරන එකකුත් නැහැ. වර්තමානයේ අපට අතරමං වෙන්න කැළෑ පාරවල් නැහැනේ. ඒ වුණත් අපි සමහර වෙලාවට සමහර තැන්වලදී මේ වැනි විශ්වාසයන්ට මුල් තැන දෙනවා. කවුරු කොහොම කිව්වත් සමහර සංකල්ප අදටත් ජනතාව අතරේ තිබෙනවා. 1990 වසරේදී පමණ මට මේ අත්දැකීම ලැබුණේ. මම මගේ මිතුරෙක් සමඟින් පොලොන්නරුවට ගිය ගමනකදී හබරණ කැලය ආසන්නයේ වාහනය නතර කළ මගේ මිතුරා කොළ අත්තක් කඩා ගසක එල්ලීමෙන් අනතුරුවයි යළිත් ගමන පිටත් වුණේ. එදා මමත් අර පුංචි පුතා වගේ ඇයි එහෙම කළේ කියා ඇහුවා. ඔහුගේ පිළිතුර වුණේ ආරක්ෂාව වෙනුවෙන් වූ විශ්වාසය කියන එකයි.

පැරණි දේවල් සදාකාලික මතකයන් ලෙස හිතේ තැන්පත් වෙනවා කියන එක ඇත්ත තමයි. ඉතිං මේ අත්දැකීමත් මගේ හිතේ තැන්පත්ව නිර්මාණයක් ලෙසින් ඔබත් සමඟ බෙදා ගන්න වසර විසිපහක කාලයක් ගත වුණා.

මෙය වෙළඳ දැන්වීමක් දක්වා පැමිණි ආකාරය සිහිපත් කළොත්?

මෙය අධ්‍යක්ෂණය කළේ අපේ කලා ක්ෂේත්‍රයේ විශේෂ වූ සිනමා අධ්‍යක්ෂවරයෙකු වන ප්‍රසන්න ජයකොඩි. අපි දෙන්නා මුලින්ම මේ පිළිබඳ විශාල කතාබහක යෙදුනා. එහිදි එකඟතාවයට පැමිණ නිර්මාණ කටයුත්ත ආරම්භ කළා. මේ නිර්මාණයට සුදුසුම කෙනා ප්‍රසන්න බව මගේ විශ්වාසයක් තිබුණා. ඔහු ඉතාම සාර්ථකව මගේ නිර්මාණයට පණ දුන්නා.

ඒ වගේම මේ නිර්මාණය තුළින් අදාළ ආයතනයේ අනන්‍යතාවය මතු කර පෙන්වන්නත් විශේෂ ලක්ෂණ මතු කළා. මේ දැන්වීමේ වර්ණ දෙස වුවමනාවෙන් බැලුවොත් ඔබට එය තේරුම් ගන්න හැකි වේවි. ඕනෑම වෙළෙඳ දැන්වීමක් තත්පර තිහකට සීමා වුණත්. අපි මෙය තත්පර හතළිස් පහක් දක්වා නිර්මාණ කළා. සම්පත් බැංකුවේ නියෝජ්‍ය සාමාන්‍යාධිකාරි තාරක රන්වලගේ අදහස වුණේ මේ දැන්වීමේ එක තත්පරයක්වත් කපන්න එපා කියන එකයි. ඔහු මෙහි වටිනාකම හොඳින්ම වටහා ගත්තා.

මෙය රූගත කරන්න සුන්දර ප්‍රදේශයකුත් තෝරා ගෙන තිබෙනවා?

මේ වෙනුවෙන් ජනාකීර්ණ ප්‍රදේශයක් අපිට තෝරා ගන්න බැහැ. ඒ වෙනුවෙන් සුන්දර ප්‍රදේශයක් අපට හමු වුණේ දකුණු පළාතෙන්. ලුණුගම්වෙහෙර ආශ්‍රිත භූමි ප්‍රදේශයක් අපි මේ වෙනුවෙන් තෝරා ගත්තා. බැංකුවේ රූගත කිරීම් වෙනුවෙන් තිස්සමහාරාම ශාඛාව යොදා ගත්තා.

දැන්වීම ගැන කතා කරන විට මෙහි ප්‍රධාන චරිතයක් වන පුංචි පුතා ගැනත් කතා නොකරම බැහැ. ඔහු මවුලි මතීෂ. ඔහුට ඒ හැකියාව ලැබෙන්න ඇත්තේ කොහෙන්ද කියලා අමුතුවෙන් කියන්න ඕනෑ නැහැ. ඔබ කවුරුත් හඳුනන රංගන ශිල්පිනි නිමන්ති පෝරගේ සහ කැමරා ශිල්පී ප්‍රභාත් රොෂාන් යුවළගේ ආදරණීය පුත්‍ර රන්නය තමයි මතීෂ. මතීෂ පුතා ඉතාම දක්ෂ ලෙසින් මේ සඳහා තම දායකත්වය ලබා දෙනවා. අපට ඒ බව කිව්වේ දන්වීමේ නිර්මාණ කණ්ඩායම. ඒවගේම හරිම දඟයෙක් කියලා තමයි අපට ආරංචි වුණේ. කොහෙම වුණත් රංගනය නම් අමුතුවෙන් කියලා දෙන්න ඕනි නැහැලු. මොන තරම් දඟකාරකම් කළත් රූගත කෙරෙන වෙලාවට අවශ්‍ය විදියට දායකත්වට ලබා දෙන්න මතීෂට තියෙන්නේ අපූරු හැකියාවක්. අධ්‍යක්ෂ ප්‍රසන්න ජයකොඩි පුතා ගහ දිහා බලන්න කිව්වම, “අංකල් මම පුදුමයෙන්ද බලන්න ඕනි” කියලා මේ පුංචි මතීෂ අහනවාලු. මේ දැන්වීම නරඹන ඔබත් ඔහුගේ දක්ෂතාවය දැනටමත් වටහා ගෙන ඇතුවා ඇති.

මවුලි මතීෂ ලයිසියම් ජාත්‍යන්තර පාසලේ දෙක වසරේ ඉගෙනුම ලබන්නේ. රංගනයට වගේම අධ්‍යාපන කටයුතුවලත් ඉදිරියෙන් සිටින මේ පුංචි පුතා ක්‍රීඩාවටත් දක්ෂයි. ඉදිරියේදී තිරගත වෙන්න නියමිත ‘ආකර්ශා’ සහ ‘ආලෝකෝ උදපාදි’ චිත්‍රපටවලින් මේ දඟකාරයාගේ රංගන දස්කම් ඔබට දැකබලා ගන්න අවස්ථාව තිබෙනවා.

මේ සමඟින් තවත් නිර්මාණයක් ඔබ ඔවුන් වෙනුවෙන් නිර්මාණය කළා?

ඔව්. එයත් සම්පත් බැංකුවේ ඩබල් එස් ඉතුරුම් ගිණුම වෙනුවෙනුයි නිර්මාණය කළේ. එහි අදහස දෙගුණයක් නිසා හැම දේම දෙක බැගින් යොදා ගත්තා. ඒ වෙනුවෙන් දායක වුණේ නිවුන් සහෝදරයන් දෙදෙනෙක්. ඔවුන් මීට පෙර කිසිම නිර්මාණයකට රංගනයෙන් දායක නොවූ අය. නමුත් ඔවුන් ඒ නිරූපණය ඉතා කදිම අයුරින් ඉටු කළා. එය අධ්‍යක්ෂණය කළේ නිලාන් කුරේ.

මේ අයුරින් අලුත් මුහුණු එක් කිරීමෙන් නිර්මාණයට යහපතක් සිදු වෙනවාද?

මගේ අදහස නම්, ඔව්. අපි ටෙලි නිර්මාණ, චිත්‍රපට ආදී වූ විවිධ නිර්මාණ තුළින් හැමදාම දකින මුහුණුවලට වඩා අලුත් මුහුණු නැවුම්. එය අපේ නිර්මාණයටත් අලුත් බවක් ගෙන එනවා. බොහොමයක් වෙළෙඳ දැන්වීම් සඳහා නිරූපණ ශිල්පීන් තමයි යොදා ගැනෙන්නේ. රංගන ශිල්පීන් යොදා ගන්නා අවස්ථාද වෙනවා. මම මේ දෙපිරිස අතරේ ලොකු වෙනස්කමක් දකිනවා. රංගන ශිල්පීන් දර්ශන තලයට යන්නේ නිර්මාණ කණ්ඩායමට ආචාර කිරීමෙන් අනතුරුවයි. නිරූපණ ශිල්පීන් එමෙම නෑ. ඔවුන් කෙලින්ම දර්ශන තලයට යනවා. මේ දක්වා කාලය තුළ ක්ෂේත්‍රයේ ලද අත්දැකීමෙන් රංගන ශිල්පීන් සහ නිරූපණ ශිල්පීන් අතරේ මා දුටු වෙනසයි. ඩබල් එස් ඉතුරුම් ගිණුමේ දැන්වීමට ප්‍රවීන රංගන ශිල්පී විජය නන්දසිරි දායක වෙනවා. ඉහත ආයතනය සමඟ ඔහුගේ බැඳීම වසර ගණනාවක සිට පැවතෙනවා.

මේ නිර්මාණයන් හරහා අදාළ පණිවුඩය සමාජ ගතවීම ඔබ සිතූ අයුරින්ම සාර්ථකව සිදු වෙනවාද?

මම සෑම විටම උත්සාහ කරන්නේ සාර්ථකව ජනතාවට දැනෙන අයුරින් අදහස් මගේ නිර්මාණ හරහා ඉදිරිපත් කරන්නයි. මේ නිර්මාණ ද්විත්වයෙන්ම එය ඉටුවන බව ලැබෙන ප්‍රතිචාරයන්ගෙන් දැනෙනවා. ලෙන්ඩින් ණය පහසුකම වෙනුවෙන් වූ දැන්වීමේදී මිත්‍යා මතයක් යැයි සිතුවද ඒ තුළ පවතින විශ්වාසය මේ නිර්මාණය සමාජගතවීම සමඟින් නැවතත් කතාබහට ලක් වෙලා තිබෙනවා. අද බොහෝ දෙනා ඒ ගැන කතාබහ කරනවා. ඒ නිසා මේ හරහා මම කියන්න උත්සාහ කළ දේ සාර්ථකව ජනතාව අතරට ගොස් තිබෙනවා.

යතේජා ඥානරත්න