වේදිකාවේ සරම කැඩුණු සහය අධ්‍යක්ෂ
වේදිකාවේ
සරම කැඩුණු
සහය අධ්‍යක්ෂ
වේගයෙන් ආපු බෝලේ කෙළින්ම වැඳුනේ විකට් එකේ.අවුට් වෙලා මම කෙළින්ම ගියේ ග්‍රවුන්ඩ්
එකෙන් එළියට . එතකොටම ඈතින් ආපු සිරිල් මහත්තය මට කතා කළා.
ක්‍රිකට් සෙල්ලම් කරල කාලේ නාස්ති කරන එකේ ,මගෙ නාට්‍යය බලන්න එන්න කියල
ආරාධනාවකුත් කළා .
ඒ ආරාධනාව මාව මෙච්චර දුරක් ගෙන එයි කියල කවදාවත් හිතුවෙ නැහැ .
කොහොමෙන් කොහොම හරි දෛවය අනුව වැඩේ සිද්ධ වුණා .
අද මං රංඟන ශිල්පියෙක් වගේම සහාය අධ්‍යක්ෂවරයෙක් .
අතීතාවර්ජනයත් සමඟ Behind The Scene තුළින් මෙවර එක්වන්නේ අත්දැකීමෙන් පරිපූර්ණ
සහාය අධ්‍යක්ෂවරයෙක් වන රොෂාන් ජයසුන්දරයි.
* ඉතින් ඊට පස්සෙ මොකද වුණේ ?
සිරිල් ගජවීර මහත්තය කියන්නේ අපේ පවුලේ හැමෝම සමඟ ඇසුරු කරන හොද අසල් වැසියෙක් .
මහත්තයගෙ පෙරැත්තය නිසාම එතුමාගෙ නාට්‍යය බලන්න මම ගියා . මේ නාට්‍යයෙ නම අපේ දරුවො
හොඳයි . මේක එදා පෙන්නුවෙ පුවක් අරම මෙතෝදිස්ත උසස් පාසලේ . නාට්‍ය ආරම්භ කරන්න
වෙලාව ලංවෙනකම් මම හොල් එකෙන් එළියට වෙලාහිටියා . සිරිල් මහත්තය හරි කලබලෙන් මගේ
ලඟට ඇවිත් කිව්ව කතාවෙන් මගේ ඇඟ පණ නැතිව ගියා වගේ වුණා . දහම් පාසලේ නාට්‍යයවල
රඟපාල තිබුණා . ඒත් කිසිම පුහුණුවක් නැතිව නාට්‍යයක රඟපාන්න පුලුවන්ද කියල මේ
මහත්තයට තේරෙන්නේ නැද්ද කියල අහන්න තරන් හිතුනත් මම එහෙම ඇහැව්වෙ නැත්තේ අමාරුවෙ
වැටිල ඉන්න වෙලාවෙ මගෙන් ඉල්ලුවෙත් උදව්වක් නිසයි .
සිරිල් මහත්තය මොකද්ද දන්නවද මට
කිව්වේ ? මේ නාට්‍යයෙ ප්‍රධාන චරිතය කරන ළමයට එන්න විදිහක් නැති නිසා , මට ඒ චරිතය
කරන්නලු . මම ඇදගෙන හිටිය පාට ඇදුම ළමයෙකුට දීල එයාගෙ සුදු ඇදුම ඇදගෙන රඟපෑව .
සිරිල් මහත්තයගෙ බලකිරීම නිසාම නාට්‍ය බලන්න ආපු මම ඓදා ගෙදර ගියෙ බලන්න ආපු
නාට්‍යයෙ රඟපාලයි . ඊට පස්සෙ පාසල් දර්ශන 200 ක විතර මම ඒ චරිතය කළා . මේ
සිදුවීමෙන් තමයි මම කලාව පැත්තට යොමු වුණේ . මෙතුමාගෙම වේදිකා නාට්‍ය කිහිපයකත් ,
ප්‍රසිද්ධ වේදිකා නාට්‍ය 25 ක පමණකත් රඟපෑවා . මේ අහඹු සිදුවීම වුණේ 2001 වර්ෂයේදී
. එදා සිට අද දක්වා මම කලා ක්ෂේත්‍රයේ නියැලී සිටිනවා .
* අහඹු සිදුවීමකින් රංගනයට පිවිසෙන රොෂාන් , ටෙලිනාට්‍ය හා චිත්‍රපට සඳහාත් අද දායක
වී සිටිනවා . හැබැයි ඒ රඟපෑමෙන් පමණක් ම නොවෙයි නේද ?
ඒක හරි. රංගන ශිල්පියෙක් වගේම සහාය අධ්‍යක්ෂවරයෙක් ලෙසත් කටයුතු කරනවා . රඟපෑමෙන්
දායක වූ පළමු ටෙලිය වුණේ බර්මින්ලයිලි මහත්මයා අධ්‍යක්ෂනය කළ ස්වරූපා ටෙලියයි . මේ
ගෙවුණු වසර 13 ක කාලය තුළ ටෙලිනාට්‍ය 22 ක වැඩ කළා . එයින් 20 කම රංගනයෙන් හා සහාය
අධ්‍යක්ෂණයෙන් දායක වුණා . පළමුවෙන් සහාය අධ්‍යක්ෂවරයෙකු ලෙස කටයුතු කළේ මොහාන්
නියාස් මහතා අධ්‍යක්ෂනය කළ සිහිනයක් පාට පාටින් ටෙලියෙයි . චිත්‍රපට ගත්තොත් හයකට
දායක වී තිබෙනවා . සහාය අධ්‍යක්ෂනය ඇරැඹෙන්නේ අපි මැරෙන්නෑ චිත්‍රපටයෙන් .අනෙක්
චිත්‍රපට වන්නේ එක මලක පෙති , වන්ෂොට් 1 , සක්විති දඩයම , මායාවි , යළිත් ඔබ එන්න .
* අධ්‍යක්ෂකවරු කීදෙනෙක් යටතේ වැඩ කර තිබෙනවා ද ? වැඩියෙන්ම වැඩකර ඇති අධ්‍යක්ෂවරයා
කවුරුන් ද ?
මේ කාල සීමාව තුළ අට දෙනෙක් යටතේ වැඩ කළා . වැඩියෙන් වැඩ කළේ මොහාන් නියාස්
මහත්මයත් සමඟයි .
* රොෂාන් , ඔබ ක්ෂේත්‍රයේ වඩා ප්‍රසිද්ධියක් උසුලන්නේ සහාය අධ්‍යක්ෂවරයෙක් ලෙස නේද
?
ඔව්
* ඒ නිසා අපි ඒ පිළිබඳව කතා කරමු.ඉතින් අපට පැහැදිලි කරන්න සහාය අධ්‍යක්ෂවරයෙක් ගේ
භූමිකාව කුමක්ද කියා ?
යම් නිර්මාණයක් කිරීමේදී අධ්‍යක්ෂවරයා එහි නිර්මාණාත්මක පැත්තට පමණයි හිත
යොමුකරන්නේ . ඒ නිසා මේ නිර්මාණය සාර්ථක කරගැනීමට අවශ්‍ය අනෙක් සියලුම කටයුතු
පිළිබඳ සොයාබලා සැලසුම් කිරීමේ වගකීම මා සතුයි .
* මොන අධ්‍යක්ෂවරයා යටතේද වැඩ කරන්න වඩාත් කැමති ?
මොහාන් නියාස් මහතා සමඟ .
* මේ වගකීම එපා වු අවස්ථා එහෙම නැද්ද ?
ඇත්තටම නැහැ. බොහොමයක් දෙනා කරගෙන ගිහින් අතර මඟ දාල ගිය නිර්මාණ කිහිපයක් සතුටින්
බාර ගෙන සාර්ථකව කරදී තිබෙනවා . වැඩ කරන්න අමාරුයි කියන රංඟන ශිල්පීන් එක්ක වැඩ කරල
තියෙනවා . මේ ක්ෂේත්‍රයෙ කවුරුත් අද වෙනකන් මාත්එක්ක තරහා වෙලා නැහැ . මේ රැකියාව
තෘප්තිමත්ව , අවංකව කළේ නැත්නම් මේ තාක් දුර එන්නට අමාරුයි .
* අමතක නොවන සිදුවීම් කිහිපයක් මතක් කරමු ?
සිරිල් ගජවීර මහත්තයගෙ වේදිකා නාට්‍යය බලන්න ගිහින් ඒ නාට්‍යයේ රඟපාන්නත් සිදුවුණු
එක කවදාවත් අමතක වෙන්නෙ නැහැ . සුනාමි වේදිකා නාට්‍යයයේ සංවේදී අවස්ථාවක් තියෙනවා ,
ගමටම උදව් කළ කෙනා මැරෙනවා . ඒ මෘත ශරීරය කරගහගෙන යන්න මමත් උදව් වෙනවා ,මගෙ
පසුපසින් එන කෙනාගෙ කකුලට මගෙ සරම පෑගිල සරම කැඩිල බිමට වැටුනා . දුක් මුසුව
බලාසිටි ප්‍රේක්ෂකයො හිනාවෙන්න ගත්තා , අධ්‍යක්ෂවරයාට තරහා ගිහින් සරම පාගපු කෙනාට
හොඳටම දොස් කිව්වා .
* අනාගත බලාපොරොත්තුව ?
හොඳ අධ්‍යක්ෂවරයෙක් වෙන්න .
* මේ ක්ෂේත්‍රයට එන්නට බලාපොරොත්තුවෙන් ඉන්න කෙනෙකුට උදව් කරන්නට ඔබ සූදානම්ද ?
දැනට දොළොස් දෙනෙකු පුහුණු කරල තියෙනවා . ඒ අය දැනටත් සහාය අධ්‍යක්ෂවරුන් ලෙස
කටයුතු කරනවා . මේ ක්ෂේත්‍රයට එන්නට කැමතිනම් මගෙ දුරකථන අංක 0777986153 ට කතා
කරන්න .
* ඔබේ පවුල් පසුබිම ගැන කියමු ?
තවම අවිවාහකයි .අම්මා , තාත්තා , මම පවුලෙ වැඩිමලා ,මට නංගියි ,මල්ලියි ඉන්නවා .
* ඉදිරි වැඩ කටයුතු මොනවාද ?
සුමිත් ගල්හේන මහතාගෙ චිත්‍රපටයක් , මොහාන් නියාස් මහතාගේ, ටෙලි දෙකක් ,ප්‍රියා
රණසිංහ මහත්මියගේ ටෙලියක් හා හම්ෆී විජේසූරිය මහතාගේ ටෙලියක් ඉදිරියේදී කරන්න
බාරගෙන තිබෙනවා .
* රොෂාන් අපේ කතා බහ අවසන් කරන්නට මත්තෙන් ඔබට මේ ගමන එන්නට අතදුන් අයත් සිහිකළොත්
හොදයි නේද ?
සිරිල් ගජවීර , දර්ශන පිගේරා , කීර්ති රත්නායක ,රූපා ගෝමස් , ජයතිලක හේරත් ,උපාලි
කීර්ති සේන , මොහාන් නියාස් , බර්මින් ලයිලි ප්‍රනාන්දු යන මහත්වරුන් හා මගේ පවුලේ
සැමට ස්තූති කරන්නට මෙය අවස්තාවක් කර ගන්නවා .
තිස්ස ධම්මික
ඡායාරූපය - මාලන් කරුණාරත්න
|
