|
|
||
ලෝක සිනමාවේ වඩාත්ම සංත්‍රාසජනක චිත්‍රපට අතර ඉතා ඉහළින් සළකනු ලබන සයිකෝ
චිත්‍රපටයේ එන එකී ජවනිකාව සිනමා ඉතිහාසයේ අමරණීය දර්ශණ මාලාවක් බැව්
අවිවාදාත්මකය.වර්තමානයේ සිනමා විචාරකයන් විසින් ලොව බිහිවුන විශිෂ්ටතම සිනමා කෘති
අතරෙහි ද සයිකෝ සළකනු ලබති. ඇල්ෆ්‍රඩ් හිච්කොක් ගේ චිත්‍රපට අතර ප්‍රියතම චිත්‍රපටය
කවරෙක්දැයි මගෙන් විමසූ කළ මගේ පිළිතුර වනුයේ රියර් වින්ඩෝ බවය. එහෙත් රූප රචනය, චරිත
ගොනු කිරීම සංත්‍රාසය බිහි කිරීම ආදී සියලු කරුණු එක් තැන් කරද්දී සයිකෝ කිසි
විටෙකත් දෙවැනි තැන්හි ලා සළකන්නට මම අපොහොසත් වීමි. වර්තමාන සිනමා හදාරන්නන් අත අත්
පොතක් බවට ද පත්ව ඇති සයිකෝ ආරම්භයේ පටන්ම විශිෂ්ට චිත්‍රපටයක් ලෙස සළකනු ලබයි. ලොව
විශිෂ්ටතම සිනමාකරුවන් දහ දෙනා අතරෙහි ලා පවා ගැනෙන නමුදු සයිකෝ නිර්මාණය කළ
ඇල්ෆ්‍රඩ් හිච්කොක් කිසි කලක ඇකඩම් සම්මාන උළෙලේ දී හොඳම අධ්‍යක්ෂක ලෙස සම්මානයට
පාත්‍ර වී නොමැත්තේය.
 |
|
හිච්කොක් චිත්‍රපටයේ ඇන්තනී හෝප්කින්ස් සහ හෙලන් මිලර් |
කෙසේ වෙතත් සයිකෝ චිත්‍රපටය නිෂ්පාදනයේ දී මුදල් යෙදවීමට එතෙක් හිච්කොක්ගේ චිත්‍රපට බහුතරයට නිෂ්පාදනයෙන් දායක වන පැරමවුන්ට් පික්චර්ස් සමාගමේ බළධාරින් අකමැති වෙයි.නෝර්ත් බයි නෝර්ත්වෙස්ට් චිත්‍රපටයට මුදල් යෙද වූයේ මෙට්‍රො ගොල්ඩ්වින් මේයර් සමාගම වන අතර එය ඔහුගේ එකම එම්.ජී.එම් චිත්‍රපටය විය.එහෙත් ඔහුගේ චිත්‍රපට බහුතරයට මුදල් යොද වූ පැරමවුන්ට් සමාගමේ ආයෝජකයන් අදිමදි කිරීම නිසා හිච්කොක් සිය නවතම චිත්‍රපටය සඳහා තමන්ගේ සුවිසල් නාන නිවහන උකස් කර දමන්නේය. එයට ඔහුගේ භාර්යාව එකඟ වනුයේ සිය සැමියාගේ සිතැඟි වලට ඉඩ දීමටය. සැමියාගේ ජීවිතය යනු සිනමාව බැව් ඇය ඉඳුරාම දන්නීය. එහෙත් එය අසාර්ථක වුවහොත් තමන් මහ පාරට වැටෙන වග ඇය නොදන්නවා නොවේ.
චිත්‍රපටයේ චරිත සදහා නිළියන් සොයා යෑමේ සිට දෙදෙනාගේ මත එකිනෙකට පෑහෙන්නේ නැත.දෙදෙනා අතර කදිම ආදර ඊර්ෂ්‍යාවක් පවතී.ඇල්මා විට්ෆීල්ඩ් සොයා යෑම හිච්කොක්ගේ කෝපය කෙතරම් ද යත් ඔහු එය පළ කරනුයේ සයිකෝ චිත්‍රපටයේ එන සංත්‍රාසය වඩා තිවෘ කෙරෙන නාන කාමරයේ පිහියෙන් අනින දර්ශණය රූ ගත කිරීමේදීය. ඇත්ත නම් සැබෑ චිත්‍රපටයේ මේරියන් ක්‍රෙන් මරා දමන දර්ශණයේ දී එම චරිතය රඟපෑ ජෙනට් ලී බිය වී කෑ ගසන්නේ සිය සිනමාකරු හිච්කොක් ටය.එහි ඇයට පිහියෙන් අනින්නට අත ඔසවන්නේ චිත්‍රපටයේ එන මිනීමරු නෝමන් බේට්ස් ගේ චරිතය රඟපෑ ඇන්තනි පර්කින්ස් නොව හිච්කොක්මය. හිච්කොක්ගේ හිතේ ඇඳී ඇති කෝපය වෙන කිසිවක් නොව තමන්ට නොකියා සිය බිරින්දෑ විට්ෆීල්ඩ් සොයා යෑමය.
ජෙනට් ලී බිය වනුයේ හිච්කොක් එම වියරුවෙන් පැමිණ පිහියෙන් අනිද්දීය. ජෙනට් ලී ගේ ඇත්ත භීතිය ලොව විශිෂ්ටතම සිනමා රූපයක් වීම වෙනමම කතාවකි. චිත්‍රපටයේ සංත්‍රාසය පිළිබඳ හිච්කොක් කෙතරම් විශ්වාසයක් ගොඩ නගා ගත්තාද යත් ඔහු චිත්‍රපටය සඳහා පසුබිම් සංගීතය අනවශ්‍ය බැව් තර්ක කරන්නේය. අවසානයේ හිච්කොක් විසින් නිර්මාණය කරන ලද චිත්‍රපටය පැරමවුන්ට සමාගම මගින් ප්‍රතික්ෂප කරනු ලබති.චිත්‍රපටය ඇල්මා අතට ගන්නේ එයින් පසුවය. සියල්ල ගසා දමා උකටලී ව යන සැමියා වෙතින් බලයෙන් ම චිත්‍රපටයේ සංස්කරණය තමා අතට ගන්නා ඇල්මා ඒ සඳහා හිච්කොක්ගේ විරෝධය නොතකා බර්නාඩ් හර්මන් ලවා විශිෂ්ට සංගීතයක් නිර්මාණය කරවයි. එමෙන්ම චිත්‍රපටයේ සංස්කරණය ද ඇයට ඇවැසි පරිදි සකස් කරන්නට ඇය සමත් වෙයි. ප්‍රේක්ෂකයා ඉදිරියේ සංත්‍රාසය මවන මහා සිනමාකරුට මුලින් තමා විසින් මෙතුවක් දැවැන්ත මුදල් උපයා දුන් සිනමා සමාගමේ බලධාරීන් අතින් ප්‍රතික්ෂප වීමෙන් නොනැවතී බිරින්දෑගේ උපදෙස් පරිදි චිත්‍රපටය නිම කරන්නට සිදු වීම කෙතරම් ශෝකජනක ද ?.
එවර තැනෙන චිත්‍රපටය පැරමවුන්ට් සමාගම මුලින් තිර ගත කරනුයේ සිනමාහල් දෙකක පමණී.කෙසේ වෙතත් සිනමාහල් හිමියන් අල්ලා ගන්නා හිච්කොක් එක් යෝජනාවකට ඔවුන් කැමැති කරවා ගනියි. ඒ චිත්‍රපට දර්ශණය ආරම්භ කළ පසු කිසිවකුත් සිනමාහලට ඇතුළත් කර නොගැනීමයි. චිත්‍රපටය ආරම්භ කළ පසු සිනමාහලේ ප්‍රක්ෂේපණාගාරයට රිංගන හිච්කොක් සිය චිත්‍රපටය නරඹනුයේ එහි ඇති කුඩා කවුළුවෙනි. සිනමාහලෙහි පිරී සිටින ප්‍රේක්ෂකයන් භීතියෙන් කෑගසන හඬ ඔහු අසන්නේ එම කවුළුව අතරිනි. හිච්කොක් චිත්‍රපටය පුරාම ජනෙල් තිර අතරින් මිනිස් ක්‍රියාකාරකම් නරඹන්නට ඇල්ෆ්‍රඩ් හිච්කොක්ගේ ඇති ආසාව මෙහිදී වඩා ඉස්මතු වෙයි. එයට පෙර නාන කාමරයේ සිට සිය බිරින්දෑ ඇඳුම් අඳීන අයුරු, කාර්යාලයේ සිට සිය ලේකම්වරියගේ ඉරියව් පමණක් නොව මහ මාර්ගයේ ගමන් ගන්නා යුවතියන් ගේ ගමන් විලාසයන් ද ජනෙල් තිර අතරින් හිච්කොක් බලා සිටින්නේය. එපමනක් නොව සයිකෝ චිත්‍රපටයේ නිළිය දෙස ද ඔහු අහම්බෙන් බලනුයේ දර්ශණ තලයේ කුඩා කවුළුවක් තුලිනි. එහෙත් එය ඔහුගේ සිතෙහි ඇති ජාගර ආකල්පයකැයි අපට නොසිතෙයි. ඒ සයිකෝ චිත්‍රපටයේ සංත්‍රාසය ගොඩ නැංවීමේ අරමුණින් අපේ මනස යොමු කර ගැනීමට ද එකී කවුළුව උපයොගී කර ගන්නා නිසාවෙනි.
සිනමා කෘතින් පාදක කර ගෙන තැනුණු චිත්‍රපට රැසක් මගේ මතකයේ වෙයි.එහෙත් හිච්කොක් ඒ සියල්ලට වඩා වෙනස් මානයක් ගෙන එයි.එකක් එය සිනමාකරුවෙකුගේ ඇත්ත ආත්මය හෙළි දරව් කරන බැවිනි. එය අපේ හාස්‍යයට හේතු වන බව ඇත්තය. එහෙත් එය සිනමාකරුවාගේ සැබෑ නිර්මාණය පිලිබඳ අප නොදන්නා කතාව නොවේද ?
නිර්මාණකරුවාගේ නිර්මානයක සැබෑ පාත්‍ර වර්ගය ඔහු සහ ඔහුගේ ලෝකය වන විට එය කෙතරම් මිහිරිද ? අවංක ද? හිච්කොක් චිත්‍රපටය අවසානයේ දී සයිකෝ චිත්‍රපටය සාර්ථක වීම පිලිබඳ ඔහු සිය බිරින්දෑට ස්තූති කරන්නේය. සිනමා කෘතියක් පිළිබඳ අප සිතනවාට වඩා දෙදෙනෙකු අතර ගොඩනැගෙන මිහිරි සබඳතාව කෙතරම් ජීවිතයට රුකුලක් වන්නේ ද ? සංසාර ගත බැඳීමක් යයි අපට සිතෙන්නේ එබඳු මිනිසුන්ගේ ජීවන වෘතාන්ත දුටු කල්හිය
