|
|
මේ ලෝකයෙන් සමුගැනීමට නොහැකිව කය නොමැතිව මෙලොව හැසිරෙන පුද්ගලයෝ හොල්මන්, අවතාර ලෙසින් හඳුන්වති. මෙම හොල්මන්, අවතාර, භූත ආත්ම පිළිබඳ නිශ්චිත අදහසක් නැතත් නූතන ලෝකයේ නවීන විද්‍යාව ඉදිරියේද සැඟව පවතින විසඳාගත නොහැකි වූ රහසක් බවට පත්ව ඇත. ඔවුන් කවුරුන්ද, කොහේ සිට කුමක් අරඹයා පැමිණෙන්නේද යන්න සේම සිරුරක් නොමැති මෙවැනි ජීවින් සත්‍ය වශයෙන්ම ලෝකයේ සිටීද යන්න අදටත් ප්‍රශ්නයකි.
එහෙත් අවතාර, හොල්මන්, භූතයන් අරක්ගෙන ඇති නිවෙස් ගැන කතා ඔබද කෙදිනක හෝ අසා ඇති
බවට සැකයක් නැත. එවැනි කතාන්දර බොහෝ නොදියුණු යැයි සැළකෙන සමාජයන්හි මෙන්ම
අමෙරිකානු සහ යුරෝපා ආදි දියුණු යැයි සැළකෙන සමාජයන්හිද දක්නට ඇත. එහෙයින් එවන්
නිවෙස් ගැන ලියවුණු චිත්‍රපටද බොහෝ වෙයි. හොලිවුඩ් ඉතිහාසයේ මෙවැනි චිත්‍රපට සිය
ගණනක් දැක්විය හැකි අතර එම කුලකයට එක්වුණු නවතම සිනමා නිර්මාණය දැන් ප්‍රදර්ශනය
අරඹා ඇත.
මීට තිස්තුන් වසරකට පෙර ස්ටීවන් ස්පිල්බර්ග් නිෂ්පාදනය කර ටෝබ් හූපර් අධ්‍යක්ෂණයෙන් එළිදුටු Poltergeist චිත්‍රපටයේ ප්‍රතිනිර්මාණයක් වූ මෙම චිත්‍රපටය පසුගිය මැයි 22 වැනිදා ට්වෙන්ටියත් සෙන්චුරි ෆොක්ස් මඟින් මුදා හැරිණි. එය ප්‍රවීණ චිත්‍රපට අධ්‍යක්ෂ ගිල් කෙනන් විසින් අධ්‍යක්ෂණය කර තිබේ. රෝයි ලී සහ සෑම් රෝනින්ග් සහ රොබට් ටෙපර්ට් එක්ව මෙය නිෂ්පාදනය කර ඇත. අසාමාන්‍ය බිහිසුණු සිදුවීම් දාමයකට මුහුණ දෙන කැලිෆෝනියානු පවුලක් ගැන මෙහි කියවෙයි. එරික් බෝවන් සහ ඇමී බෝවන් සිය දරුවන් වන සැන්ඩ්‍රා, ග්‍රිෆින් සහ මැඩී සමඟ නව නිවසක පදිංචියට යන්නේ එරික්ගේ රැකියාව අහිමිවීමත් සමඟිනි. කවට, මිත්‍රශීලි භූතයින් පිරිසක් බෝවන් පවුලේ ළබාල දැරිය මැඩී සමඟ මිතුරු වේ. පවුලේ අනෙක් සාමාජිකයන්ගේ අදහස ඇය සිතින් මවාගත් අයෙකු සමඟ මිතුරු වී ඇති බවයි. නමුත් වියරු භූතාත්ම විසින් ඇය වසඟයට ගෙන ඇති බැවින් කුඩා මැඩී බේරා ගැනීමට විශාල පරිශ්‍රමයක් දැරීමට සිදු වෙයි. 1982 වසරේ ස්පිල්බර්ග් නිෂ්පාදනය කළ Poltergeist චිත්‍රපටය අද්භූත කතා තේමා රැගත් චිත්‍රපට අතරේ සුවිශේෂ වන චිත්‍රපටයක් ලෙසින් හැඳින්විය. ඩොලර් මිලියන 10.7ක පිරිවැයක් දරා නිර්මාණය කළ එය ඩොලර් මිලියන 121.7ක ආදායමක් වාර්තා කළේය. 82 වසරේ ඇකඩමි සම්මාන ත්‍රිත්වයක් සඳහාද එය නිර්දේශ විය. ක්‍රෙග් ටී නෙල්සන්, ජෝබෙන් විලියම්ස්, බ්‍රියටිස් ස්ට්‍රේයිට්, ඩොමිනික් ඩුනේ ඇතුළු පිරිසක් එහි චරිත මැවූහ. එය IMDB දර්ශකයේ 7.4/10ක් ලබන විටදී රොටෙන්ටෙමැටෝස් සහ මෙටාක්‍රිටික් දර්ශක පිළීවෙලින් සියයට 88ක් සහ සියයට 79ක් වාර්තා කළේය. ඉන් අනතුරුව 1986 වසරේදී Poltergeist : The Other Side සහ 1988 වසරේදී Poltergeist III චිත්‍රපට නිර්මාණය කෙරිණි. The Lagacy නමින් රූපවාහිනි කතා මාලාවක්ද විකාශය විය.
1982 වසරේ සිට අද දක්වා වන විට තාක්ෂණයේ විශාල පරිවර්තනයකට ලක් වී තිබේ. එහිදී එදා නිර්මාණයට වඩා විශාල වෙනස්කම් අද නිර්මාණයේදී දකින්නට පුළුවන. නවීන තාක්ෂණයෙන් යුත් අයිෆෝන් සේම ළමුන්ගේ සෙල්ලම් බඩුද විශාල වෙනසක් පෙන්නුම් කර තිබේ. එසේම මුල් නිර්මාණයට වඩා නව නිර්මාණයේ අවසානය වෙනස් බව ඇතැමුන්ගේ මතයයි. එසේම නව Poltergeist හට විචාරකයන්ගේ හොඳ ප්‍රතිචාර ද ලැබී නොමැත. Poltergeist t යන වචනය පැරා මනෝවිද්‍යාවේදි භාණ්ඩ එහා මෙහා කිරීම, විවිධාකාර ශබ්ද නැඟීම ආදි වශයෙන් ක්‍රියාකරන භූතයින් හැඳින්වීමට යෙදෙන්නකි. මෙම භූතයන් ඉදිරියේදී කුමක් කරනු ඇතිද යන්න සේම මැඩීගේ අනාගතය කෙසේ වේවිද යන්නට පිළිතුර Poltergeist නරඹා දැකගත හැකිය.
|
|
||||||||
|
|
||||||||
සියළුම හිමිකම් ඇවිරිණි |
මේ දිනවල තිරගත වන
Poltergeist චිත්‍රපටයේ තිර රචනය ඩේවිස් ලින්සේ ඒබ්‍රියේ
විසින් රචනා කර ඇති අතර සෑම් රොක්වෙල්, රෝස්මෙරි ඩීවිට්, ජෙරාඩ් හැරිස්, ජේන්
ඇඩම්ස්, සැක්සන් ෂාබ්‍රිනෝ ඇතුළු පිරිසක් රංගනයෙන් දායක වෙති. අමෙරිකාවු ඩොලර්
මිලියන 35ක පිරිවැයකින් නිර්මාණය කළ මෙම සිනමා නිර්මාණය මේ වන විට අමෙරිකානු ඩොලර්
මිලියන 47.7ක ආදායමක් උපයාගෙන තිබේ. අත්භූත සිදුවීම් රැගත් චිත්‍රපට ආදායම් අතරේ
පළමු දින තුන අතර ඉපැයූ ඉහළ අදායම් අතරට පැමිණෙන්නට
Poltergeist චිත්‍රපටයට හැකි
වී තිබේ.
